O Centro Social Faisca de Vigo organizou para a Agrupaçom de Montanha "Augas Limpas" um curso de iniciaçom à escalada.
Membros do Clube Alpino Faísca, clube de escalada vinculado ao centro social do mesmo nome impartirom curso de iniciaçom à escalada para a AMAL.
O curso tivo lugar no monte Galinheiro, situado na serra do mesmo nome, entre as parróquias de Zamáns e Vincios e a 13 km de Vigo. A formaçom rochosa que coroa o monte e na que se realizou o curso é um gnaisse*, rocha pizarrosa semelhante ao granito que raras veces se atopa na superfície da corteza terrestre como aqui, sendo um dos menos de meia dúzia de casos que existem no mundo.
A jornada começou com a subida até a zona de escalada, desde onde graças ao dia claro puidemos desfrutar das vistas sobre os vales circundantes e a ria.
Depois de termos chegados, os monitores do curso facilitarom-nos o material preciso (pes de gato, cordas, arnês, grilos,…) e as noçons básicas sobre a sua utilidade e de como usá-lo. Com estas explicaçons e as que surgirom sobre a marcha fomos aprendendo as técnicas básicas: fazer força com as pernas mais que com os braços, como manejar a corda, quê fazer em caso de esbarar,.. .
A modalidade de escalada que praticamos é a conhecida como escalada desportiva, quer dizer, trepar por paredes previamente equipadas com seguros de maneira que com total segurança só tens que preocupar-te de subir sem mais ajuda que os pes e as maos.
No Galinheiro existem 174 vias de escalada, com alturas entre os 6 e 34m; e dificuldade entre os niveis 4 e 7c+/8anas que a rocha apresenta zonas com distintas formas o que conleva variaçons na dificuldade.
Realizamos 3 subidas sobre tres das vias do Galinheiro, todas de dificuldade básica (nivel 4). Os monitores subirom primeiro colocando a corda nos seguros e depois trepamos o resto já asegurados.
A experiencia resultou moi positiva, tanto polo repto de enfontar-se à subida dumha parede, como polo ambiente de companheirismo e desfrute do meio ao que vai ligado a prática da escalada.
Muito obrigadas aos monitores!!
* Gnaisse: Rocha metamórfica ou cristalofílica que tem sufrido transformaçons na sua composiçom e estrutura por altas temperaturas e grandes presons, principalmente. Considera-se umha fase anterior ao granito.
Obtenido de "http://pt.wikipedia.org/wiki/Gnaisse"
CRÓNICA EM IMAGENS DO CURSO:
APRESENTAÇOM DO ROTEIRO:
Domingo 21 de Xunho.
Curso de iniciaçom à escalada:
O Centro Social Faisca de Vigo organizou para a Agrupaçom de Montanha "Augas Limpas" um curso de iniciaçom à escalada.
A jornada tambem será aproveitada para fazer um pequeno roteiro polo monte Galinheiro e visitar os seus petroglifos.
Características: O curso é gratuito. Será na zona de escalada do monte Galinheiro.
Material e comida: Os proprios monitores do curso facilitaram pés de gato (calçado especial para escalar) às pesoas participantes. Levade roupa cómoda para escalar. Levade auga (2 litros por pesoa) e comida para o jantar.
Data e saida: Domingo 21 de junho. Combinamos às 10:30h no CS Faisca de Vigo.
A comarcal de Comportela da Agrupaçom de Montanha "Augas Limpas" organiza coa colaboraçom da Gentalha do Pichel um roteiro polo Val do Duvra.
Saída: 8:30 da manhá diante do concelho de Bembibre.
Percorrido: Subida ao Picoto e Rota das Carvalheiras.
Dificuldade: Mui baixa. Nesta ocasiom, e sem que sirva de precedente, a dificuldade da rota é nula.
Conselhos: Levar roupa adequada ao tempo (um chuvasqueiro nunca está de máis) e calçado cómodo para caminhar. Também é precisso levar auga (2 litros por pesoa) e comida para o jantar.
Val do Duvra. Notas geográficas
Visitamos nesta ocasiom o extremo norte da comarca compostelana. O concelho actual atinge um território antigamente povoado; como todas as terras vizinhas, tem importantes assentamentos castrejos. No Cronicon Iriense, documento eclesiástico que atinge dos séculos VI ao X, já aparece mentada a "Terra de Dubriam". O rei suevo Miro assignara esta terra à sede de Íria. Mais adiante, baixo o arcebispado de Soares de Deça, passaria ao distrito de Trástamara.
A geografia do concelho tem umha grande unidade morfológica. Estamos em terras do Tambre, alimentado polas águas do pequeno Duvra. A conca do vale está fechada polos quatro costados e compacta o território. Geologicamente, faz parte da foxa meridiana, que parte de Tui e chega a Carvalho, percorrendo o extremo oeste da comarca de Ordes.
O Val do Dubra, historicamente volcado para a produçom agrogadeira, é conhecido pola importáncia ecológica e a beleza das Ribeiras do rio Duvra, que ocupam por volta de 400 hectáreas. O espaço florestal autóctone compagina-se com as pradarias, básicas para o noutrora pujante sector gadeiro. O abandono do rural e da plurifuncionalidade dá como resultado o crescimento do mato de eucaliptos e pinheiros.
Todos estes traços vamos comprová-los do alto do Picoto. Partiremos da paróquia do Rial e ascenderemos a um cúmio formoso algo estragado polas novas antenas de telefonia móbil e as plantaçons indiscriminadas de eucaliptos. Da sua cima contemplaremos o monte Castelo, já em Santa Comba, e perto dos 600 metros. Olhamos para o norte, e alviscamos já o vale de Bergantinhos. Umha vez na parte baixa, andaremos os bosques ribeirinhos e perderemo-nos na frondosidade das fragas.
Desde Galiza Non Se Vende queremos denunciar os contínuos maltratos e agresións que soporta o noso litoral, fruto da especulación salvaxe e deste modelo depredador de crecemento economico, que equipara medre e benestar social.
Por desgraza, todos os gobernos que pasan pola Xunta seguen unha política “desarrollista” de explotación dos nosos recursos naturais para reducilos a mera condición mercantil. Os costes deste desenvolvemento económico son a destrucción da natureza.
A privatización e venta da nosa costa, das nosas rías, do noso vento, dos nosos montes, dos nosos rios, do Courel, supón depredar o territorio físico común para mercantilizalo en beneficio de só duns poucos. Privatizando beneficios e socializando as perdas.
Deste modelo cego e xordo non se libra o litoral onde se construen recheos dentro das rías que estragan a súa grande riqueza; onde se instalan polígonos industrias sobre o terreo gañado ao mar ou en primeira liña de costa realizando desmontes; onde se instalan as industrias mais perigosas como Reganosa ou máis contaminantes como Ence; onde empresas e industrias de todo tipo verten os seus refugallos directamente ao mar xunto coas aguas residuais urbanas, as veces pasando por depuradoras deficitarias ou que non funcionan contaminando as rías e facendoas incompatíbeis coa pesca e o marisqueo; onde se promoven piscifactorias nos lugares mellor conservados da nosa costa artificializandoos com formigón e contaminando o mar com antibióticos para proveito de empresas transnacionais; onde se privatiza o mar e a costa com portos deportivos a esgalla que soen levar aparellados proxectos urbanisticos especulativos; onde se produce a máis salvaxe especulación urbanistica; onde se construen a meirande parte das irracionais infraestructuras de transporte; onde se destrue a identidade dos pobos e vilas mariñeiras erradicando o noso patrimonio marítimo; onde máis se turistifica a nosa cultura e o noso território; onde se crean máis campos de golf arrasando com grandes superficies de monte e contaminando com herbicidas; onde menos se respetan os espazos protexidos….
Non é necesaria, nen imprescindible a destrucción do noso fogar común para acadar medios de vida, nin debemos basar o benestar na explotación das persoas nen a terra que habitamos, porque si asi fora estaríamos correndo o camiño do suicidio colectivo.
Todas e todos xuntos temos que porlle freo a esta locomotora desvocada, deste falso progreso, que esta a avanzar queimando os seus propios vagóns nunha tola carreira cara ningures. Esta “valorización” do territorio ten que distinguir xa os bens de uso, os modos de vida, do expolio e despoxo da nosa terra. Tratase en suma dunha nova mentalidade que trate o medio non como un negocio, do que se pode quitar beneficio, senon coma a nosa terra común da que todas e todos formamos parte. Vainos nelo a preservación da civilización que queremos legar ás persoas que veñan detrás de nós, non podemos tolerar máis o intolerabel. Por isto convocamos A unha grande manifestación nacional en Vigo o 31 de maio ás 12:00 que sairá desde a praza do concello e rematará na Praza da Estrela. E a un grande roteiro contra Reganosa polas ruas de Ferrol o vernes 5 de Xuño ás 20:00 desde o edificio da Xunta de Galiza.
ESTE MODELO TEN ALTERNATIVA DEFENDAMOS O LITORAL GOBERNE QUEN GOBERNE GALIZA NON SE VENDEl
O Centro Social Faisca de Vigo organiza para a Agrupaçom de Montanha "Augas Limpas" um curso de iniciaçom à escalada.
A jornada tambem será aproveitada para fazer um pequeno roteiro polo monte Galinheiro e visitar os seus petroglifos.
Características: O curso é gratuito. Será na zona de escalada do monte Galinheiro.
Material e comida: Os proprios monitores do curso facilitaram pés de gato (calçado especial para escalar) às pesoas participantes. Levade roupa cómoda para escalar. Levade comida para o jantar.
Data e saida: Domingo 21 de junho. Combinamos às 10:30h no CS Faisca de Vigo.
O sábado 9, com um dia soleado que acabaria por atoldar-se cara a noitinha, como estava previsto sete sendeiristas começamos a caminhada por volta das onze da manhá, a menos de um quilómetro ao norte da barragem de As Portas. Desde o primeiro momento seguimos umha pista que bordeja todo o perímetro Norte do encoro.
Nos primeiros quatro quilómetros é relevante a instalaçom de numerosas colmeias, mesmo no próprio caminho, tirando proveito das grandes extensons de ericáceas para fornecer as abelhas com as suas flores que tam bom gosto dam ao mel. Depois de atravessar a última zona de colmeias, as gestas e as carqueijas, as urzes e até os tojos figerom-se donos do caminho, dificultando enormemente a marcha. Desde aquí o ritmo baixou muito, chegando a ocupar-nos umhas quatro horas os oito quilómetros restantes até o refúgio.
Toda vez que aprofundamos no corgo do regueiro Malharelo atopamos mais umha prancha de cemento, das que no seu dia serviam para dar continuidade à pista por riba das baixadas de auga, mas que hoje ficam já desastradas. Detemos a marcha nesta, e nom nas anteriores, para contar umha anedota relacionada com a história de Augas Limpas. E é que na altura em que dous militantes do E.G.P.G.C. andavam à procura do lugar onde levantar o campamento, deu em chover durante dias, com o que os militantes nom toparom amparo milhor que um dos tubos da prancha de cemento, já que por este nom passava a auga. Ali estiverom até três dias.
Depois desta breve parada chegamos a umha poça da que poderia ter saído a inspiraçom do nome do campamento, pois a claridade da sua auga convidava mesmo a bebê-la. Deste ponto até o refúgio restam uns duzentos metros, mas muito íngremes, aportando um pouquinho de aventura ao percorrido. Umha vez no refúgio colocamos umha pequena placa indicando quem e em que altura se construiu, para que as e os visitantes nom esqueçam a história do lugar. Ali também aproveitamos para jantar. Depois retomamos o caminho de regresso, aínda que desta volta, nalgum anaco, escolhemos ir a rentes da auga e nom pola pista. Isto convidou ao banho e pouco antes do final da rota houvo quem pegou um mergulho para aliviar o calor.
Quanto à fauna do lugar, da que já déramos um bo repasso teórico os dias prévios, andando a rota puidemos observar várias das espécies assinaladas. O minhato queimado (Milvus migrans), também alviscado duas semanas antes na jornada de preparaçom da andaina, foi umha das aves de rapina que mais claramente distinguimos, mas também nos acompanhou a sorte ao passar bem perto nossa umha tartaranha cinzenta (Circus pygargus). O lagarto das silvas (Lacerta schreiberi) foi umha das espécies mais espectaculares das que se mostrarom aos e às excursionistas. Quanto a mamíferos foi só chegando ao final do dia quando um assustado corço (Capreolus capreolus) fugiu a fume de caroço ao nosso passo. Resulta abraiante a velocidade com a que se movem estes animais, atingindo num intre outeiros que a nós nos levaria um bom bocado. Por último falar do temido lobo. Nom é que o víramos, mas si deixou a sua pegada. Por umha parte os seus excrementos, mas também o feito de que duas semanas antes tivéramos visto um javali morto ao pé do rio e agora, do javali, só ficava parte da cabeça e o costelar bem relambido, e mesmo o termos atopado restos óseos de corço polo chao, som factos que revelam inequivocamente a presência do mítico Canis lupus: O LOBO.
Crónica em imagens do roteiro:
">Imagem do campamento do roteiro do 9 de maio de AMAL
Placa colada na parede do campamento "Augas Limpas" neste roteiro em lembrança @s companheir@s do "Exército Gerrilheiro do Povo Galego Ceive"
Momento de colocaçom da placa na parede do campamento "Augas Limpas" do EGPGC
Quarto do campamento do EGPGC utilizado como cozinha
APRESENTAÇOM DO ROTEIRO
O vindeiro 9 de Maio visitaremos Augas Limpas, base que o Exercito Guerrilheiro do Povo Galego Ceive tivo nos montes do Invernadoiro.
A saída será o sábado 9 de Maio, às 8:30, desde a estaçom de autocarros de Ourense.
Características da ruta
Se habitualmente temos como alvo das nossas saídas qualquer cúmio, desta volta nom será assim. Augas Limpas agarda perto da beira do encoro de Portas, ao pé do Pico Ortiga (1526m), concretamente no corgo que recolhe as augas do regueiro Malharelo.
Percorrido: 24 quilómetros sem desnível a umha altitude media de 850 metros. A ruta é de ida e volta.
Dificuldade: Média.
Veu dada tanto pola distáncia quanto polo estado de abandono da pista que temos de seguir, com trechos de avondosa maleza e tojeiras, o que dá num caminhar forçado e mais lento, obrigando-nos a empregar 8 horas para terminar a ruta.
O regresso será a manhá do domingo, depois de passar a noite em tendas de campismo.
Recomendaçons
No momento de escolher a roupa que levamos às marchas é importante saber que características tem o terreo. Neste caso, como digemos, caminharemos por umha pista abandonada com zonas de tojeira e maleza, polo que devemos levar umhas calças resistentes que nos amparem no possível dos pinchos. Uns vaqueiros podem ser umha boa escolha pois nom vamos ter grandes ascensos ou descidas fortes, mas tede em conta que podemos ter um dia bastante caloroso (máximas de 20 ºC).
Estremos expostos ao sol na maior parte da andaina, polo que é apropriado levar protecçom, tanto cremes quanto bonés ou sombreiros quem quiger. Este ponto é importante, aínda sabendo que podemos ter o ceo atoldado, pois a radiaçom afecta-nos igual.
Quanto à comida, temos de levar para todo o sábado e mesmo almoço para o domingo. Durante a marcha é necessário levar alimentos energéticos e ligeiros para ir ingerindo em pequenas paradas, por exemplo frutos secos (figos, dátiles, amendoas...) ou fruta, chocolate... Assim como qualquer cousa para fazer umha pequena comida ao meio-dia. Necessario LEVAR AUGA, mínimo um litro e méio per cápita, aínda que ao chegar a Augas limpas poderemos encher de novo as garrafas, pois entre o calor, o esforço e o pó da maleza, a sede vai ser de certo umha companheira de viagem.
Finalmente durmiremos em tendas de campismo, polo que levaremos todo o material necessário para isto: tenda, saco-cama, isolante, lámpada...
Breve resenha histórica
A finais da década de 80 o cerco policial sobre o EGPGC estreitou-se até o ponto de obrigar a militantes, que até daquela se agachavam em moradas de gente conhecida, a fugir cara lugares mais seguros. Foi no verao de 1987 quando José Antonio Matalobos Rebolo e Antom Árias Curto, depois de terem esquadrinhado boa parte da montanha do País constroim o refúgio de Augas Limpas no corgo do Malharelo, regueiro que verte no encoro de Portas, situado ao Leste dos montes do Invernadoiro.
Logo histórico do EGPGC
A escolha do lugar atendeu ao carácter oculto deste, mas sobre todo o facto de estar muito perto de Portugal. Quanto ao nome, é evidente que se deve à cristalinidade das augas do Malharelo, que baixam desde o Pico Ortiga para estagnar-se numha pequena poça antes de morrer no encoro.
Umha vez construído, os moradores foram Antom Garcia Matos, José Manuel Sam Martim Bouça, Manuel Chao Do Barro e Daniel Leal, instalados alí no inverno do 1988.
A sua estadia prolongou-se até o 28 de Maio desse ano, quando o Sam Martim, o Toninho e a Susana iam a umha reuniom com os militantes que estavam no refúgio de Porto-Mouro, no canhom do Sil. Essa noite caeram presas e presos no encoro de Guístolas os primeiros, e na ponte que atravessa cara Castro Caldelas caeram o Matalobos, o Curto e o Campuzano.
Resenha ecológica
O encoro de Portas, por onde caminharemos, está ao Sur-Leste do Parque Natural dos Montes do Invernadoiro. Este é um espaço natural de carácter montanhoso situado ao Sur do maciço central na província de Ourense, entre os ríos Ribeira Grande e Ribeira Pequena, e formado polas Serras de Sam Mamede, Queixa, Maceda e o Fial das Corças, que constituem o Maciço Central Ourensam, com altitudes entorno ós 1000-1600m, situadas no termo municipal de Vilarinho de Conso.
As altas montanhas de cumes cobertos de pastos, mostran nas suas pinadas abas grandes extensons de queirugais que, chegando às ribeiras dos rios, cedem o protagonismo às fragas e soutos fluviais nos que a vida bule de forma sorprendente. Aqui e ali, escuras e espalhadas manchas de pinheiros recordam a que foi a árvore predominante no passado. A fauna que tem aqui o seu fogar, assombra pola sua riqueza e adaptaçom ao medio.
O espaço destaca pola sua riqueza faunística, botánica e enorme interesse geomorfológico e paisagístico. Actualmente conta coa categoria de parque natural desde o 5 de Junho de 1997, Decreto 155/1997 (DOG do 27 de Junho de 1997); mas foi refúgio de caça como espaço natural em regime de protecçom geral coa Orde do 15 de Novembro de 1989 e coa regulaçom das actividades de uso público segundo a Orde do 8 de Janeiro de 1990, ocupando umha extensom de 5500 ha.
O clima é um dos factores interactuantes do medio físico galego. Este parque natural, devido ao seu carácter de terra interior, nom participa das características do clima oceánico na mesma medida do que outros espaços galegos, senom que, estando dentro da zona de clima oceánico, aproxima-se mais ao clima continental. Por outra parte, o seu complicado relevo dá-lhe ao clima umha variedade mui notável, coa apariçom de microclimas de pequena extensom.
Os veráns som suaves, com temperaturas por volta dos 15º C, e os invernos bastante frios, com mínimas que podem chegar aos -7º C. A pluviometría é mui avondosa ( 2000mm/ano) , com parte das precipitaçons em forma de neve. O seu verao, caloroso e seco, dá-lhes carácter mediterráneo a algumhas das suas áreas, mas ao tempo, tem umha grande influência atlántica (oceánica). Este carácter mixto que na actualidade desfruta a Serra, é o que lhe dá um grande interesse à sua vegetaçom, por dar-se no limite das regions eurosiberiana e mediterránea.
Vegetaçom
Este espacio natural está encadrado na rexión Eurosiberiana, provincia Cántabro-Atlántica, sector Galaico-Portugués, subsector Xuresiano Queixense.
A forte influencia mediterránea pom de manifesto umha etapa madura da serie Vaccinio myrtilli-Quercetum roboris sigmetum, com abundante apariçom do rebolo (Quercus pynenaica), ou denotada também pola ausência da Daboecia cantabrica nas formaçons de mato de urze e tojo...
A associaçom dominante é a Genistello tridentatae-Ericetum aragonensis, e também com umha abundáncia importante, ainda que em menor proporçom do que a anterior, atopámonos coa associaçom Agrostio duriaei-Sedetum pyrenaici. Também destacam as formaçons de prados ibéricos silíceos, que obedecem maioritariamente à associaçom Teesdaliopsio confertae-Festucetum summilusitanae.
Destacam como espécies de interesse os capudres (Sorbus aucuparia), os teixos (Taxus baccata) e abrunheiros (Prunus spinosa), entre as árvores, pola importáncia da alimentaçom que tenhem na fauna, assi como as silvas (Rubus ulmifolius), avelairas (Corylus avellana) e estripeiros (Crataegus monogyna), entre os arbustos.
Fauna
A fauna presenta a pirámide trófica completa. O lobo, único superdepredador presente, actua sobre as povoaçons naturais de corço e javali. O mais importante é a presença dumha povoaçom de doze exemplares com permanência mais ou menos estavel e com um comportamento de predaçom sobre animais selvagens, em oposiçom a outras povoaçons "degeneradas", que som predadoras “oportunistas" sobre aves de curral, depósitos de lixo, etcétera.
Som também mamíferos notaveis da área:
O leiróm gris (Glis glis), o teixugo (Meles meles), a marta (Martes martes), a gardunha, (Martes foina), o arminho (Mustela erminea) e a donicela (Mustela nivalis). Encontramos também povoaçons notaveis de ungulados, coma o corço (Capreolus capreolus), o cervo (Cervus elaphus) e mais o gamo (Dama dama).
Ademais destas espécies, estám presentes o desmám (Galemys pyrenaicus), o tourom (Mustela putorius) e mais a lontra (Lutra lutra) que habitualmente vivem no rio, ribeiras e zonas húmidas en geral.
Quanto à avifauna presente, é de destacar a presença de duas parelhas de águia real (Aquila chrysaetos) que, malia nom chegarem a criar no interior do parque, si utilizam o espaço como zona de alimentaçom. Anthus campestris (pica papuda), Bubo bubo (bufo real), Circaetus gallicus (águia cobreira), Circus cyaneus (gatafornela), Circus pygargus (tartaranha cinzenta), Falco peregrinus (falcom peregrino) ou Perdix perdix hispaniensis (perdiz charra) som só algúns exemplos das numerosas aves que habitam no parque natural do Invernadeiro.
O Centro Social Faisca de Vigo organizou para a Agrupaçom de Montanha "Augas Limpas" um curso de iniciaçom à escalada.
