13 de setembro de 2017




Detalhes para o Acampamento 2017


Olá montanheiras!
Já está toda pronto para o acampamento: esta sexta-feira, dia 15 de Setembro, vemo-nos em Cerdedo! Este post é para vos achegar algumhas informaçons e materiais de utilidade:
- O lugar no que vamos acampar nom é acessível em carro: haverá, por tanto, que deixar os carros a uns dous kilómetros, e ir caminhando desde ali até o lugar de acampada. Para fazermos isto todas juntas, combinaremos na sexta-feira, dia 15, às 19:00 na Praia Fluvial de Cerdedo. Quem tiver pensado chegar na sexta-feira mas nom puder estar a essa hora, pode ter igualmente como referência a Praia Fluvial para deixar o carro, e umha vez ali telefonar para alguém da organizaçom para chegar até o lugar de acampada. Pedimos-vos que, se este é o vosso caso (chegar ao acampamento sexta-feira depois das 19:00), vos ponhades em contacto com nós quanto antes, para organizar melhor a recepçom.
- O seguinte ponto de encontro (para quem nom puder chegar na sexta) é sábado dia 16, às 9:00 na aldeia de Cabenca (acarom de Cerdedo). Quem chegar nesse momento deixará o carro ali, almorçará e partirá desde ali, com o resto da gente, para o roteiro: montará a tenda, portanto, na tardinha do sábado, ao voltar do roteiro.
- Nesta ligaçom podedes descargar um mapa da zona pola que estaremos e pola que caminharemos. É recomendável que levedes ao roteiro umha cópia impresa: https://share.riseup.net/#r-0oWVL-q9tZnaYFcw745A
- As previsons do tempo som boas: nom se espera chuva nem calor excessivo. Contodo, nom está de mais levar roupa de abrigo, porque soplará vento do norte e é provavel que, sobretodo polas noites, a temperatura seja fresca.
- Lembrade, além disso, de levar alimentos para a ceia da sexta-feira, e o jantar do sábado e mais o domingo, além de recipientes para água, calzado adequado, umha mochila pequena (para levar ao roteiro), tenda de campismo, saco, isolante e lanterna.
Um saúdo, e até a sexta!

18 de agosto de 2017



VIII ACAMPAMENTO DE VERAO DA AMAL

15, 16 e 17 de Setembro em Cerdedo


Estamos de volta! Após um descanso mais longo do desejado, a Agrupaçom de Montanha Águas Limpas volve ao monte. E fazemo-lo celebrando a oitava ediçom do nosso Acampamento de Verao, com o que damos a bem-vinda ao outono e preparamos umha nova temporada de montanha, terra e liberdade. Natureza, convívio, arredismo, roteiros, debate, jogos, foliada... dam conteúdo à melhor opçom para passar o último fim de semana do verao!

O lugar escolhido desta vez é A Revolta, em Cerdedo, ao pé do Monte Seixo e da Serra do Cando. As datas som 15, 16 e 17 de Setembro.




Eis o programa detalhado do Acampamento:

 

Sexta-feira dia 15 de Setembro

 

- 18:00 Recepçom de montanheiras/os. Combinaremos na Praia Fluvial de Cerdedo, para desde ali ir ao espaço no que acamparemos.

- Pola noite: jogo nocturno.


Sábado dia 16 de Setembro

 

- 9:00 Roteiro pola Serra do Cando. Duraçom aproximada: 8 horas / Dificuldade: média.
Combinaremos às 9:00 na aldeia de Cabenca, para que podam aderir pessoas que nom pudessem ter vido na noite anterior.
Ao roteiro é necessário levar recipiente com água e comida para o jantar.
Haverá atividades alternativas para pessoas que nom podam realizar o roteiro completo.

- Pola noite: foliada.

 

Domingo dia 17 de Setembro

 

- 10:00 Jogo de Pistas.

- 14:00 Jantar.

- 16:00 Assembleia. Falará-se da programaçom montanheira para a tempada que se inícia. Aproveitaremos também para falar da próxima ediçom das Olimpiadas Populares Galegas.

- 19:00 Volta à casa!



Inscriçons

Para participar no campamento cumpre inscrever-se antes do dia 10 de Setembro, enviando um e-mail com o nome e telefone de contacto a aguaslimpas@gmail.com.

Há umha quota de inscriçom de 10 €, que se pagará no próprio acampamento, e que servirá para sufragar os gastos polos almorços do sábado e do domingo, e pola ceia do sábado.

É necessário, pois, que as e os participantes traiam comida para a ceia da sexta-feira, o jantar do sábado (que se fará em meio do roteiro) e o jantar do domingo.
Também é necessário levar tenda de campismo, saco, lanterna, roupa e calçado de montanha, pratos, talheres e recipiente para levar água.

  

18 de janeiro de 2015

Proxima marcha

Imos a neve!

Os proximos dias 23., 24 e 25 de janeiro volvemos a Trevinca..

Bota-te ao monte!

8 de setembro de 2014

VII ACAMPAMENTO DE MONTANHA DA AMAL


Serra do Gerês, 19, 20 e 21 de Setembro.
Convidamos-vos mais um ano ao acampamento de montanha que, como nas anteriores ocasions, organizamos no último fim de semana do verao. Este ano continuaremos a trilhar, como nos últimos roteiros, a Serra do Gerês.

Acampamento.
Acamparemos junto ao refúgio de Requiás, perto da paróquia com este nome, ao Nor-leste da Serra. O recebimento terá lugar a sexta feira dia 19 a partir das 19 h.
Cumpre levar tenda de campismo e as cousas necessárias para fazer noite, sem esquecer a lanterna (que será imprescindível para o jogo nocturno!).
Actividades
O Sábado dia 20 faremos um roteiro circular partindo do refúgio, pola zona de Pitoes das Junias. Para quem deseje incorporar-se ao acampamento o Sábado, tem que estar no refúgio de Requiás antes das 9 h.
Pola noite, logo da ceia, propomos um jogo por equipas no monte que já muitas conheceredes por acampamentos anteriores, e convidamos-vos a trazer os vossos instrumentos para a foliada.
O Domingo de novo sairemos caminhar, umha rota belida até a capela de Sam João de Pitões. De volta faremos umha paradinha nas fervenças do Beredo e, se o tempo é bom, ainda nos poderemos dar um banho lá.
Nesta paragem faremos um oco para a formaçom, reflexom e o debate, com umha conversa sobre as Aldeias Comunitárias da Raia, umha experiência ainda próxima na história e carregada de ensinanças face o futuro.  

Logo voltaremos para jantar, desfrutar da sobremesa e despedir esta sétima ediçom do acampamento de montanha, nom sem antes achegar propostas e inquedanças a respeito dos posíveis roteiros à realizar no próximo curso.
Comida
A organizaçom encarregara-se das comidas do fim de semana, exceptuando a ceia da sexta-feira. A ceia do Sábado e o jantar do Domingo serám de prato. Como sempre, cada quem tem que trazer prato, talheres e copo da sua casa, assim como garrafa para levar auga ao roteiro.
Cumpre anotar-se antes da quarta feira dia 17 por co-e: aguaslimpas@gmail.com
ou bem no tlfe: 687 913 857
O preço, para quem puder paga-los, é de 20 euros.
Bota-te ao monte!!

13 de janeiro de 2014

25 e 26 de Janeiro: Trevinca

Mais umha vez da AMAL faremos rota polo maciço de Trevinca: o sábado partiremos de Vilanova para atingir Pena Trevinca, o mais alto cúmio do maciço com 2127m de altura, bem indo por Valmeladas ou polo Maluro e volvendo polo Sestil. O domingo turraremos até a Lagoa da Serpe desde a aldeia da Ponte. Por tanto estamos a falar dum achegamento à vertente Oeste do maciço.

Assim a ROTA partirá o sábado às 8:30 de Vilanova, para o que durmiremos já na sexta no albergue. Daremos cabo neste dia duns 30 km que deixarám atrás lugares como o Valmeladas ou o Maluro, a Morteira dos Campos, o Crestóm do Lombo Roncim, Pena Trevinca e de baixada já o Sestil. Para o domingo agardan-nos por volta de 15 km e umha dificuldade muito menor, pois como já indicamos iremos da Ponte à Lagoa da Serpe.

O MATERIAL necessário será
  • Saco-cama e toalha para o albergue.
  • Roupa de inverno: gorro, luvas, braga...Também polainas ou calças impermeaveis e se nom se tenhem é bom que o avisedes ao anotar-vos, pois podemos conseguir algumhas polainas ou argalhar apanhos caseiros
  • É interessante levar bússola para nom depender únicamente do guia. Ademais repartiremos cópias do mapa da zona a percorrer.

Quanto à COMIDA a levar, será necessário levá-la toda de casa. O único a comentar é que na rota do sábado, ao ser longa, será bo ter frutos secos ou mueslis, pois som energéticos e cómodos para ir petiscando.

Como já vimos, é importante ANOTAR-SE com tempo para que poidamos fazer a reserva do albergue. Fazede-o contestando a este correio indicando o nome dos assistentes e se necessitades polainas. A estáncia há custar 8.5 € por noite. Se tedes algumha dúvida mais podedes consultar bem no correio, bem chamando ao 988280400 (de 9:00 a 13:00 de segunda a sexta, perguntar por Antom)

23 de outubro de 2013

NA TERRA DE NÁVIA-EU: 8-9-10 Novembro

Foto de roteiro de AMAL pola comarca do Návia-Eu
 
AMAL deslocará-se até a Galiza oriental para percorrer a terra de Oscos, no Eo-Návia. A zona de Oscos ronda os 600m de altitude, cumha altitude máxima de 950m. A maior parte da sua povoaçom adica-se à gandeiria, principalmente à produçom de carne de vacum. Tem umha grande riqueza mineral e geográfica, aproveitada historicamente polas suas gentes e patente nos indícios e restos de antigas extraçons de ferro e ouro. Som muitos os muinhos, fraguas e ferreirias que se podem atopar nas beiras dos rios, algumhas destas instalaçons ainda funcionando. É importante sobre todo a produçom de cuiteleria, por parte dos ferreiros, que é a tarefa que mais se conserva hoje e que ainda serve como verdadeiro ofício. Hidrograficamente, os Oscos pertencem à bacia do rio Návia. O Agueira, afluente deste que nasce na Fonsagrada, atravessa os Oscos e desemboca à altura de Pelorde, no concelho de Pesoz.

Durante os roteiros caminharemos nas inmediaçons do Agueira e dos seus afluentes.A sua flora está conformada principalmente por árvores caducifólias como o carvalho, a bidueira, o castinheiro ou o freixo, rodeadas de outras coma o azivro ou o teijo. No que respeita à fauna nom podemos esquecer a presença do lobo (Canis lupus) que conta com um número considerável de indivíduos na serra da comarca.

A sexta-feira e o sábado, disporemos dum lugar a coberto no que fazer noite, no concelho de Santalha. É necessário levar isolante para o chão e saco de dormir e comida para o fim de semana.
Os roteiros serám o Sábado e o Domingo.
Dificuldade média-baixa.

Enviaremos mais informaçom nos próximos dias. Podes ligar ao 687 913 857 para qualquer consulta.

Podes ver umha das nossas visitas á comarca do Návia-Eu clicando aquí

27 de setembro de 2013

Publicamos un precioso vídeo sobre o Courel e animamos a visitar o web dos nossos colaboradores e companheiros de luita de SOS Courel
AXUDA URXENTE PARA O COUREL!!!

25 de setembro de 2013

Algumhas quantas fotinhas do acampamento de montanha 2013


 
Publicamos algumhas quantas fotinhas á espera dumha crónica escrita do nosso acampamento de montanha 2013. Nos vindeiros dias publicaremos também mais fotos para ilustrar o acampamento de AMAL deste ano que decorreu no Courel.

6 de setembro de 2013

VI ACAMPAMENTO DE MONTANHA

Desde fai anos, da AMAL organizamos um Acampamento de Montanha no último fim de semana do verao, que sempre adicamos à denúncia dalgumha das agressões que está a sofrer a nossa Terra.

Este ano, no VI Acampamento, centraremos o nosso discurso contra da exploraçom mineira, a “última moda” nos desastres ambientais que ameaçam o nosso território, impostos polos interesses do capitalismo transnacional, que reserva para o nosso país o mais lamentável papel de colónia fornecedora de matérias primas para o desenvolvimento industrial.

O IV Acampamento vai ter lugar na Serra do Courel, belida ainda mais nestas alturas do ano.

O programa é o seguinte

Sexta feira, dia 20
Recebimento a partir das 19 h.
Ceia
Jogo nocturno

Sábado, dia 21
Almorço
Roteiro: Rota circular partindo desde a aldeia de Hórreos.
Ceia
Foliada e jogos nocturnos.

Domingo, dia 22
Almorço
Rota etnográfica
Jogos populares

12h.
Palestra informativa sobre a situaçom do Courel.
Dinámica de grupo: Alternativas.
Jantar
Sobre mesa e encerramento.

O preço do acampamento é de 20 euros, destinados à elaboraçom das comidas e a sufragar outros gastos derivados da organizaçom. A ementa é a seguinte:
- Almorço (Sábado e Domingo): Café, leite, cacau, torradas, marmelada, fruta.
- Comida para o roteiro: Um par de sandes e fruta.
- Ceia Sábado: Lentelhas e arroz, pam; Sobre mesa de castanhas do Courel; Café.
- Jantar Domingo: Massa, pam; Salada; Sobre mesa de castanhas do Courel; Café

Todos as ementas serám elaboradas sem carne nem peixe, exceptuando as sandes do roteiro que incluirám opçom carnaca.

 Outras questions de importancia
 
- A ceia da sexta feira vai por conta de cada montanheira, nom a organizamos nós.
- Cumpre levar prato, copo e talheres para as comidas, e todo o necessário para durmir (tenda, saco...).
- A aldeia de Horreos, onde imos fazer noite e as actividades do Domingo tem auga numha fonte. Cumpre que cada quem leve a sua garrafa ou cantimplora.
- Nom dispomos de ponto de luz, polo que era boa cousa levar focos ou lanternas.
- O roteiro do sábado parte às 9h desde a aldeia de Horreos; às pessoas que cheguem o sábado cumpre que esteam pontuais a esta hora.
-Os carros nom se podem meter na aldeia de Horreos, polo que ficarám estacionados a um Km de distância, aproximadamente. Indicaremos com um cartaz a zona de estacionamento, mas se houver qualquer dúvida podedes ligar aos telefones: 687 913 857 // 649 536 270
- Se alguem nom solucionou o jeito de ir ou volver, que ligue para nos, que ainda fica algumha vaga de carro.

Como chegar
Desde Ourense:
Desde Lugo:
 
Mais informaçom, consultanos no nosso co-e: aguaslimpas@gmail.com

30 de maio de 2013

Galiza nom é umha mina!! Manifestaçom nacional contra a minaria salvaxe

Cartaz da convocatória
 
Representantes de várias das organizaçóns que integram o colectivo ContraMINAcción, do que a nossa agrupaçom forma parte, oferecerom uma conferência de imprensa o 16 de maio, para anunciar uma grande manifestaçom em Compostela para o próximo 2 de junho, que partirá às 12:00 horas da Alameda. Com esta manifestaçom, que as entidades organizadoras auguramos maciça, pretende-se expressar o rexeitamento que está a gerar o incremento de concesións mineiras na Galiza por parte da Xunta sem atender à salvagarda de espaços protegidos, comunidades humanas e médio ambiente; nem à defesa dos milhares de pessoas e postos de trabalho que estám ameaçados polas actividades extractivas de umhas poucas empresas.

Desde a Agrupaçom de Montanha Áugas Limpas animamos a participar na manifestação de 2 de junho para deter o espolio do nosso território que está a ser perpetrado por umas poucas empresas, o meirande delas estrangeiras.

Detalhes para o Acampamento 2017 Olá montanheiras! Já está toda pronto para o acampamento: esta sexta-feira, dia 15 de S...